Kabulukan sa BoC tutuldukan ni Lapeña
Duterte umaasa
MANILA, Philippines - Umaasa si Pangulong Rodrigo Duterte na matutuldukan ni Isidro Lapeña na itinalaga niyang bagong hepe ng Bureau of Customs ang korupsiyon at bulok na sistema ng ahensiya.
Ayon kay Duterte, may tiwala siya sa kakayahan ni Lapeña na matutugunan nito ang mga problema sa BOC.
Idinagdag pa ni Duterte na ipauubaya rin niya kay Lapeña kung nais nitong magsagawa ng malawakang reorganisasyon sa ahensiya.
Si Lapeña na kasalukuyang pinuno ng Philippine Drug Enforcement Agency ay papalitan ni PNP Region 3 Regional Director Chief Superintendent Aaron Aquino.
Samantala, tiniyak kahapon ni Senador Panfilo Lacson na mahihirapan na ang sindikato ng illegal smuggling sa loob ng Bureau of Customs (BoC) dahil sa pagkakatalaga dito kay Lapeña.
Ayon kay Lacson, magdadalawang-isip na ang mga protektor ng mga illegal shipments lalo na ang mga nagpapalusot ng droga sa BoC ngayong si Lapeña na ang bagong Customs commissioner kapalit ng “sinibak” na si Nicanor Faeldon.
Sa isang ambush interview, sinabi ni Lacson na tiwala siya kay Lapeña at kilala niya ang pagkatao nito kaya umaasa siyang magagampanan ng opisyal ang kanyang tungkulin huwag lamang umanong matangay sa bulok na sistema ng BoC.
Samantala, hinamon kahapon ni Magdalo Rep. Gary Alejano si dating BoC Commissioner Nicanor Faeldon na basagin ang pananahimik nito at ibunyag ang mga opisyal ng pamahalaan na sangkot sa smuggling.
Ginawa ni Alejano ang hamon makaraang tanggalin ni Pangulong Rodrigo Duterte sa puwesto si Faeldon bunga ng kontrobersiyal na pagkakalusot sa BoC ng P6.4 bilyong halaga ng shabu.
Sinabi ni Alejano na tama lamang na sibakin na ng Pangulo sa posisyon si Faeldon dahil sa kapalpakan at pananagutan nito sa smuggling ng bilyong halaga ng shabu sa BOC.
Hinamon din ni Senador Ralph Recto si Lapeña na abutin nito ang P1.28 bilyong “daily collection goal” ng bureau.
Ayon kay Senate Presidet Pro-Tempore Ralph Recto, dapat ay wala nang oras para kay Lapeña na mag-on the job training (OJT) at kailangang tutukan nito ang pag-abot sa tinatarget na koleksyon ng BoC. (Malou Escudero, Ellen Fernando at Joy Cantos)
- Latest