Kian rally okay lang sa Malacañang
Iginagalang ng Malacañang ang karapatan ng mga mamamayan na mag-rally upang ihayag ang kanilang mga sentimiyemto. AP/Bullit Marquez
MANILA, Philippines - Iginagalang ng Malacañang ang karapatan ng mga mamamayan na mag-rally upang ihayag ang kanilang mga sentimiyemto.
Ito ang sinabi kahapon ni Presidential Spokesperson Ernesto Abella kaugnay sa mga rally na balak idaos para sa 17-taong gulang na estudyante na pinatay sa Caloocan ng mga pulis dahil sa sinasabing nanlaban habang hinuhuli ng mga awtoridad.
Ayon kay Abella, mismong si Pangulong Rodrigo Duterte ang nagsabi na pinapayagan nito ang mga protest ng mga mamamayan basta’t hindi ito nagiging sagabal sa gawain ng publiko at hindi nalalagay sa alanganin ang seguridad ng mga mamamayan.
Ipinaliwanag pa ni Abella na bahagi ito ng pinaniniwalaang pilosopiya ng Pangulo kaugnay sa kritisismo na bahagi umano ng isang nagta-trabahong gobyerno.
Hinikayat ni Abella ang mga magpo-protesta na makipagtulungan sa mga awtoridad na inaasahang magpapatupad ng maximum tolerance sa mga rally.
- Latest
