Sa Barcelona batang Pinoy kabilang sa patay sa van attack

MANILA, Philippines - Iniulat kahapon ng Department of Foreign Affairs na isang pitong taong gulang na batang Pilipino na naunang napaulat na nawawala ang kabilang sa mga namatay sa van attack sa Barcelona, Spain kamakailan.

Kinumpirma ni DFA Secretary Alan Peter Cayetano ang pagkamatay ni Julian Cadman, isang British-Austrian na anak ng isang Pilipina na nasugatan sa atake.

Sinabi ni Cayetano na isinaad sa report ni Charge d’Affaires Emmanuel Fernandez ng Philippine Embassy sa Madrid na ang bangkay ng bata ay nakilala ng ama nito.

Inatasan naman ng kalihim si DFA Undersecretary for Migrant Workers Affairs Sarah Arriola na magbigay ng tulong sa pamilya ng bata at sa iba pang Pilipinong nabiktima ng van attack sa Barcelona sa naturang bansa. (Rosette Adel at AP)