3 Pinoy patay sa hajj sa Saudi
MANILA, Philippines - Dahil sa matinding init ng panahon, tatlong Pinoy pilgrims na ang naitatala ng Saudi authorities na nasawi sa kasagsagan ng hajj sa Mecca, Saudi Arabia.
Sa ulat na nakarating sa Konsulado ng Pilipinas sa Jeddah, ang tatlong Pinoy ay kapwa binawian nang buhay matapos na atakihin sa puso sa gitna ng pagdagsa at pagsamba ng mga kapwa Muslim sa sagradong lugar sa Makkah.
Kinilala ng embahada ang mga nasawi na sina Norma Mangatong Darak, Abdur Rahman Hajinur at Lawan Sigayan, pawang tubong Marawi City.
Si Darak, nasa 50-anyos, ay unang ibinalita ni Vice Consul Alexander Estomo ng Phl Consulate General sa Jeddah na nasawi dahil sa heart attack noong Agosto 9 at makalipas ang ilang araw ay namatay din sina Hajinur, 62, at Sigayan, 31, nitong Agosto 13.
Nabatid na tinatayang nasa 6,000 Pinoy pilgrims ang nakiisa ngayong taon sa pagdaraos ng hajj pilgrimage sa Mecca na magsisimula sa Agosto 25.
Karaniwang nakararanas ang mga pilgrims ng mga sakit tulad ng ubo, sipon, pagkahilo at pananakit ng ulo na nagiging dahilan din ng heat stroke o heart attack dahil sa matinding summer sa Saudi.
Taun-taon ay ginagawa ang hajj pilgrimage sa nasabing sagradong lugar sa Saudi kung saan dinadaluhan ng milyun-milyong debotong Muslim na nagmula sa iba’t ibang panig ng mundo.
- Latest