‘Middleman’ ng P6.4 shabu inaresto sa rape case
MANILA, Philippines - Matapos isalang sa pagdinig ng Senate blue ribbon committee, agad na inaresto kahapon ng mga ahente ng National Bureau of Investigation (NBI) sa loob mismo ng Senado ang negosyanteng si Kenneth Dong na sinasabing “middleman” ng P6.4 bilyong shabu shipment mula China na ipinuslit sa Bureau of Customs (BoC).
Pero agad nilinaw ng NBI na hindi konektado sa droga ang paghuli nila kay Dong.
Sinabi ni NBI spokesman Ferdinand Lavin na galing umano sa Parañaque court ang warrant of arrest dahil sa kasong rape.
Lumutang ang pangalan ni Dong nang ihayag ng broker-importer na si Mark Taguba na nagsilbing “middleman” ang una sa 604 kilong shabu.
Mas lalong lumutang ang pangalan ni Dong nang mabunyag na nagbigay umano siya ng milyun-milyong campaign funds sa ilang mga senador noong nagdaang halalan at kinuha pa niyang ninong at ninang sa kanyang kasal.
Nagsilbing sponsors sa kasal ni Dong sina Senators Risa Hontiveros, Francis Pangilinan at Juan Miguel Zubiri noong 2013.
Sina Sen. Joel Villanueva at Hontiveros ay nakatanggap umano ng milyun-milyong campaign funds mula kay Dong at maging si Sen. Ralph Recto ay malapit din umano kay Dong.
- Latest