Parojinog siblings negatibo sa ilegal na droga

MANILA, Philippines – Matapos sumailalim sa pagsusuri, nag-negatibo sa paggamit ng ilegal na droga ang magkapatid na sina Ozamiz City Vice Mayor Nova Princess Parojinog-Echavez at Reynaldo Jr.

Kinumpirma ni Superintendent Ramos Bergonia ng Philippine National Police (PNP) Crime Laboratory ang resulta ng drug test sa magkapatid para sa paggamit ng methamphetamine o mas kilala sa tawag na shabu at marijuana.

Isinagawa ang pagsusuri isang araw matapos silang arestuhin at dalhin sa PNP Custodial Center noong Hulyo 31.

“Urine specimens of the arrested living persons gave negative results to the test for the presence of methamphetamine and THC-metabolites, both dangerous drugs,” sabi ni Bergonia.

Nadakip ang magkapatid at iba pa nilang mga kasamahan matapos ang madugong raid sa kanilang tahanan na ikinasawi ng kanilang magulang na sina Ozamiz City Mayor Ozamiz City Mayor Reynaldo Parojinog Sr. at misis na si Susan.

Sa kabila nito, sinabi ni PNP spokesman Chief Superintendent Dionardo Carlos na walang apekto ang resulta ng drug test sa kaso ng magkapatid.

“Hindi naman dahil ‘yung naging operation ng CIDG is servicing of the warrant for any contraband that is indicated in the six search warrants – high powered firearms, explosive and drugs,” paliwanag ni Carlos.

“So yung dalawang nag-negative (Parojinog siblings), hindi naman negative yung result ng search warrant. Kung nag positive sila (drugs), maaaring magkaroon pa ng additional violation of  Republic Act 9165 or use of illegal drugs,” dagdag niya.

Isa si Mayor Parojinog sa mga pinangalanan ni Pangulong Rodrigo Duterte na kabilang sa mga “narco-politicians.”