Nagsuot ng military uniform sa SONA ‘Juana Change’ kakasuhan ng AFP

MANILA, Philippines - Nakatakdang sampahan ng kasong kriminal ng Armed Forces of the Philippines (AFP) ang komed­yanteng si Mae Paner na mas popular bilang si Juana Change dahil sa hindi awtorisadong pagsusuot ng uniporme ng militar sa katatapos na State of the Nation Address (SONA) ni Pa­ngulong Duterte noong Lunes.

Sinabi ni AFP Spokesman Brig. Gen. Restituto Padilla Jr., na hindi parte ng lehitimong organisasyon o maging ng reservists corps ng AFP ang komedyante at mahigpit itong ipinagbabawal sa mga sibilyan.

“Her act of illegally using an AFP uniform is in violation of Article 179 of the Republic Penal Code Unauthorized Use of Uniforms) at Republic Act  493 (Prohibition of Use of Insignias, Decorations , Badges and patches prescribed for the AFP,” pahayag ni Padilla.

“We will take the ne­cessary legal action to hold Miss Paner accountable,” paliwanag pa ng AFP.

Ayon kay Padilla hindi sila aapela kay Paner dahil sa bawat oras o pagkakataon na isuot ng komedyante ang uniporme ng militar ay may karagdagan itong kaparusahan.

Nilinaw naman ni Padilla na tanging ang mga artista na may mga lokal na pelikula o anumang teleserye na nagsusuot ng uniporme ng militar ang pinahihintulutan ng AFP pero ito’y masusing sumasailalim sa kanilang pagbibigay ng panuntunan at superbisyon.

“She must first read the cited laws in order to understand why she is being held liable. The malicious intent also betrays her motive,” ani Padilla.

Sinabi naman ni Lt. Col. Ray Tiongson, Spokesman ng Philippine Army na ang uniporme ng militar ay simbolo ng kapangyarihan na dapat isuot ng tama at may dignidad.

“The unauthorized wearing by civilians impacts negatively on the image of the Philippine Army and the Armed Forces of the Philippines, apart from security implications,” ayon kay Tiongson.

Inihayag pa ni Tiongson na ang mga elementong kriminal na nagsusuot ng uniporme ay nasasangkot sa paghahasik ng terorismo na nagpapanggap na mga sundalo.