Dating Sen. Jinggoy Estrada, pinayagang makalabas ng kulungan

MANILA, Philippines - Pinahintulutan ng Sandiganbayan 5th Division si dating Sen. Jinggoy Estrada para makalabas ng kulungan at makapagpasuri sa ospital.

Sa desisyon ng anti-graft court, maaaring lumabas ng Philippine National Police (PNP) custodial center si Estrada ngayong araw, Hulyo 27 dakong alas-8 ng umaga hanggang Hulyo 29, ng alas-8 ng umaga.

Si Estrada ay iko-confine sa Cardinal Santos Medical Center sa San Juan City kung saan siya isasailalim sa videocolonoscopy.

Tulad ng mga naunang desisyon, bawal pa rin gumagamit si Estrada ng anumang gadget o telecommunication device at makapanayam ng media.

Nais masiguro ng doktor ng dating senador na wala itong problema kaya papasukan ng tubo na mayroong camera ang kanyang puwet para masilip ang kanyang bituka.

Si Estrada ay nahaharap sa kasong plunder kaugnay ng pagtanggap umano ng kickback mula sa non-government organization ni Janet Lim Napoles kung saan napunta ang kanyang pork barrel fund.