NPA sunod na gigiyerahin! - Duterte
Sarado na si Pangulong Rodrigo Duterte na ipagpatuloy pa ang peace talks sa rebeldeng Communist Party of the Philippines-New People’s Army-National Democratic Front (CPP-NPA-NDF). PPD/Karl Norman Alonzo, File
MANILA, Philippines - Sarado na si Pangulong Duterte na ipagpatuloy pa ang peace talks sa rebeldeng Communist Party of the Philippines-New People’s Army-National Democratic Front (CPP-NPA-NDF).
Sinabi ng Pangulo sa mga sundalo ng 103rd Brigade ng Philippine Army ng magtungo ito kamakalawa sa Marawi City, na sa sandaling matapos ang pakikipaglaban sa Maute-ISIS group ay isusunod na niyang giyerahin ang NPA.
Wika ng Pangulo, marami ng pulis at sundalo ang pinatay ng NPA kaya sila na ang isusunod na operasyon ng AFP.
“Huwag kayo masyado magkumpiyansa dyan, kasi there is a strong resurgence. Nabubuhay na naman ang npa. pagkatapos nito, letse itong putukan na ito, kapag naubos ang mga ulol, mag-re-orient tayo, NPA na naman kasi marami silang utang sa atin. ayaw ko na makipag-usap sa kanila. Marami na akong sundalo na pinatay nila, marami na akong pulis na pinatay nila,” sabi pa ni Duterte.
Noong isang araw, limang miyembro ng Presidential Security Group (PSG) ang nasugatan nang makaengkwentro ang nag-checkpoint na miyembro ng NPA sa Arakan, Cotabato.
Bukod dito, may sundalo ring pinatay habang namamalengke sa Palawan.
Naunang sinuspinde ng Office of Presidential Adviser on Peace Process (OPAPP) ang informal talks ng government panel sa NDF panel.
Nais naman ng Office of the Solicitor General na hilingin sa Korte na kanselahin na rin ang piyansa ng mga nakakalayang NDF consultants kasunod ng suspension ng peace talks.
Magugunita na nakatuntong na rin sa wakas si Pangulong Duterte sa Marawi City matapos ang dalawang beses na pagkabigong mapasok ang nasabing lungsod dahil sa masamang panahon.
- Latest
