Maute namumugot na ng hostage
MANILA, Philippines - Masuwerteng nakaligtas ang ilang mga sibilyan na hostage ng Maute Terror Group sa araw ng itinakdang pagpugot sa kanilang ulo.
Ito ayon sa isang sibilyan na si ‘Romy’ sa kanyang pahayag sa ABS-CBN makaraang makatakas ng maglunsad ng airstrike ang mga militar.
Aniya, tatlong araw umano silang na-hostage at hindi pinakain dahil pupugutan naman din daw sila ng ulo.
Napag-alaman na tatlong sibilyan na hostage ang pinuputulan nila ng ulo araw-araw.
Wala umanong sinasanto ang mga terorista dahil maging ang kanilang katribu na Maranao ay pinugutan din nila ng ulo, ibig sabihin walang ligtas pati ang mga Bisaya.
Sa araw na siya naman ang pupugutan, suwerteng nagsagawa ng air strike ang militar.
“Suwerte kami. Schedule na pugutan kami ulo, dumating ‘yung helicopter, nagbomba. Sabi, ‘Ipasok sila ulit! Ipasok sila ulit,’” aniya.
Akala niya ay ligtas na siya, pero muli siyang itinali at pinaluhod kinabukasan.
Kinaumagahan ay inilabas na sila ng bahay para sa nakatakdang pagpugot kung saan may dalang mahabang tabak ang mga terorista gamit sa pagpugot sa kanilang ulo habang nakaposas ang mga ito.
“Noong nilalabas na kami, dumating na ulit ang helicopter. Bomba ulit. ‘Pasok sila ulit! Pasok ulit!’ Takbuhan sila,” dagdag pa ni Romy.
Doon na tumakas si ‘Romy’ at iba pa niyang kasama. Tumalon sila sa ilog at lumangoy patungo sa safe zone.
Hindi lahat ay nakaligtas dahil ang iba niyang kasama ay hindi marunong lumangoy at nanghina dahil di pa kumain.
- Latest