P5M multa sa fake news
MANILA, Philippines - Isinusulong na sa Senado ang panukalang patawan ng multang P100,000 hanggang P5 milyon at pagkabilanggo ng mula isa hanggang limang taon ang mga nagpapakalat ng fake news.
Sa panukala ni Sen. Joel Villanueva, panahon na para magkaroon ng batas na magpaparusa sa mga nagpapakalat ng mga fake news kung saan mas mabigat o doble ang ipapataw na multa at parusa kung ang sangkot ay mga opisyal o empleyado ng gobyerno.
Maging ang mga tumulong lang o nanghikayat na magpakalat ng mga pekeng balita ay papatawan din ng multang mula P50,000 hanggang P3 milyon at pagkabilanggo ng mula anim na buwan hanggang tatlong taon.
Maging ang mass media enterprise o social media platform na tumangging tanggalin ang isang pekeng balita ay pagmumultahin naman ng mula P10 milyon hanggang P20 milyon at pagkabilanggo ng mula 10 hanggang 20 taon.
Dagdag ni Villanueva, dapat lamang magkaroon ng batas na magiging daan para mahinto ang mga fake news.
Dapat din aniyang magkaroon ng mataas na moral ang mga opisyal ng gobyerno at hindi makisali sa mga nagpapakalat ng mga pekeng balita.
- Latest