Video ng DOT na ‘Experience the Philippines’ kinopya?

MANILA, Philippins – Inulan ng batikos ang Department of Tourism (DOT) matapos nilang maglabas ng bagong tourism ad campaign na ‘Sights’ dahil sa pagkakapareho nito sa ibang bansa.

Ilang oras mula ng ito’y maipalabas, mabilis na napuna ng netizens ang pagkakahawig ng video ng DOT mula sa isang South African Tourism campaign ad noong 2014.

Marami ang nakapansin na tila kinopya ang ideya at sikwensiya ng nasabing video sa South Africa kung saan pinapakita ang isang bulag na turista.

Kaagad naman dumipensa si Tourism Assistant Secretary Frederick Alegre at iginiit na hindi sila nanggaya.

“[The video is} not a rip-off,” wika ni Alegre sa kaniyang panayam sa Early Edition ng ABS-CBN News Channel.

“While it has similarity with the ads of South Africa, the biggest difference really is that is a true story. The Japanese retiree is an actual retiree residing in the Philippines," dagdag niya.

Samantala, naglabas na rin ng pahayag ang ad agency na McCann Worldgroup sa ad campaign na ginawa nila para sa DOT.

Hango, anila, sa tunay na buhay ang kanilang ad campaign at iginiit na wala silang intension na gayahin ang ideya ng iba.

“Our latest film, “Sights,” was particularly inspired by the story of a visually-impaired foreigner who has made the Philippines his home and who has come to experience the Philippines in different ways,” nakasaad sa pahayag nila.

“We acknowledge the feedback that the way this story was told may have similarities with the South African tourism campaign. It is unfortunate that the DOT has been called out and accused of plagiarism, for work we have done to highlight the testimonial of a real retiree,” dagdag nila