30 manggagawa naipit sa Marawi
Pinaligiran ng Maute
ZAMBOANGA CITY, Philippines — May 30 civilian worker ang nanawagan na kagyat silang masagip dahil pinapaligiran sila hanggang kahapon ng mga militanteng Maute sa Marawi City, Lanao del Sur.
Tinawagan ng mga sibilyan ang kanilang mga pamilya at hiniling na iligtas sila ng puwersa ng pamahalaan mula sa mga militanteng Maute.
Isa sa mga sibilyan na si Romar Maralino ang tumawag sa kanyang asawa at sinabing napapaligiran sila ng Maute group na nagtatangkang pumasok sa isang gusali sa Rajah Madaya Perez Street sa Marawi City.
“Ngayong tanghali, tumawag ang mister ko, nakikiusap na mailigtas agad sila dahil pinapaligiran na ng mga terorista ang gusali at winawasak ang gate para makapasok at kunin sila bilang bihag,” sabi ng asawa ni Romar na si Joy.
Sinabi ni Joy na ang kanyang mister ay kasama ng kapatid niyang si Romer at ibang kasamahan na sina Michael Casimiro at Jimmy Esperat, na pawang mula sa Marawi City. May 26 na iba pang obrero ang nakulong sa gusali.
Sinabi naman ng tagapagsalita ng Western Mindanao Command na si Capt. Jo-Ann Petinglay na inalerto na ang ground forces para sa rescue.
Idinagdag ni Petinglay na tinututukan ng mga sundalo ang mga partikular na lugar na kinasasadlakan ng mga militante. (Roel Pareno)
- Latest