Libreng internet sa pampublikong lugar, isang pirma na lang
MANILA, Philippines - Isang pirma na lang ang kailangan upang maging ganap na batas ang panukala tungkol sa libreng internet sa mga pampublikong lugar.
Ayon kay Sen. Bam Aquino, pirma na lamang ni Pangulong Duterte ang kailangan para maging ganap na batas ang panukala na niratipikahan ng Senado ang pinal na bersiyon.
“Isang pirma na lang po at magiging batas na ito. This measure will empower Filipinos with internet access to education, information, jobs and business,” ani Sen. Aquino.
Naniniwala ang senador na malaki ang maitutulong ng panukala para mas maging maayos ang internet sa bansa na pinakamabagal sa Asya.
Naratipikahan na rin ng Kamara ang pinal na bersiyon na ipadadala sa Malacañang para sa pirma ni Pangulong Duterte.
Layunin ng panukala na lagyan ng libreng internet access sa lahat ng tanggapan ng pamahalaan, pampublikong paaralan, pampublikong transport terminals, pampublikong ospital at pampublikong library.
Sa ilalim ng panukala, aatasan ang Department of Information and Communications Technology (DICT) na bumuo ng plano sa pagpapatupad ng programa.
- Latest