Russian bomb panlaban sa ISIS

Hihilingin ni Duterte kay Putin

MANILA, Philippines - Nais ni Pangulong Duterte na bumili ng precision-guided bombs sa Russia sa pagbisita nito ngayong linggo upang magamit ng gobyerno laban sa kaaway ng pamahalaan kasama na ang ISIS terrorist group.

Aalis ngayon ang Pa­ngulo at kanyang delegasyon mula Davao City patungong Russia para sa official visit sa imbitasyon ni Russian President Vladimir Putin.

“Hirap tayo ngayon. So we have this ISIS thing. I’ve been scouting around for. Im going to Russia (today). Same purpose, if they can spare us with precision guided. We have so many smart bombs but not as accurate as one. It’s guided by the laser or by the satelites,” sabi ni Pangulong Duterte sa kanyang mensahe kamakailan sa Philippine Coast Guard auxilliary convention sa Davao City.

Nakatakdang lagdaan ang defense cooperation sa pagbisita ni Duterte sa Russia upang lalong palakasin ang ugnayan ng 2 bansa pero hindi para magkaroon ng defense treaty.

“We have the dumb bombs which will just...bahala na kung sino ang tatamaan. Which we are really trying to not to use it because it could cause several collateral damage,” pahayag ni Duterte.

Ilang ulit nang sinasabi ng Pangulo ang alok ng Russia na suplayan ang Pilipinas ng mga high-powered weapons kahit sa mas mababang halaga o kahit na “buy one take one”.

Habang nasa Moscow si Duterte ay magkakaroon ito ng bilateral talks kay Pres. Putin na hiwalay sa pakikipagpulong nito kay Prime Minister Dmitry Medvedev.

Sinabi naman ng DFA, maraming kasunduan ang nakatakdang lagdaan din sa pagbisita ni Duterte sa Moscow mula May 22-26 kabilang dito ang defense cooperation, military and technical cooperation, treaty on legal mutual assistance in criminal matters, treaty on extradition at MOU cooperation on security sa pagitan ng national security councils ng 2 bansa.

Magugunita na inimbitahan ni Putin si Duterte na bumisita sa Russia matapos silang magkita sa APEC summit sa Lima, Peru noong nakaraang taon.