Terrorist videos nakuha gikan sa mga cellphones

CEBU, Philippines - Miabot og 248 ka mga video ang nakuha sa taga Criminal Investigation and Detection Group -7 gikan sa mga cellphones sa mga sakop sa bandidong grupo nga narekober human sa unang engkwentro niini tali sa mga sakop sa Armadong Kusog sa nasud ug kapulisan niadtong Abril 11 didto sa Inabanga, Bohol.

Matud pa ni Supt. Royina Garma ang Regional Chief sa CIDG-7 nga nahinabi sa Banat News ila usab nga iendosar sa buhatan sa Anti-Cybercrime ang cellphone ni Saad Samad Kiram aron masuta kung aduna bay makuha nga mga information niini may kalabutan sa ilang operation sa Bohol.

Ang mga cellphone nga narekober niadtong Abril 11 encounter sa Inabanga adunay mga videos ni Osama Bin Laden, mga pagpamutol og ulo, training sa mga batang terorista ug mga kanta.  Apan sagad sa mga videos naglambigit sa mga foreign terrorist groups.

Samtang gitug-an ni Garma, ang cellphone ni Supt. Maria Christina Nobleza adunay mga text sa pinulongang Tausog. Apil na niini ang gikan sa matud pa anak ni Ahmad Santos nga si Said Santos nga giingong kauban sa mga Abu Sayyaf sa Bohol.

Una niini, si Nobleza giingong gusto untang mo- rescue sa usa ka alyas Saad nga giingong sakop sa royal family sa Sulu, apan niining bag-o giingong ang anak ni Ahmad Santos ang buot nilang ma-rescue.

Si Nobleza kuyog sa iyang bana nga si Reenor Dungon, Judith Pidoy ug usa ka 13-anyos nga bata nga giingong anak usab ni Santos sa dihang nadakpan sila duol sa Barangay Bacani, Clarin diin nahitabo ang engkwentro niadtong Abril 11 nga gikamatay ni Joselito “Abu Alih” Melloria ug tulo ka mga kaubang bandido.

Si Garma nitug-an nga kidnapping ang tuyo sa grupo apan nabulabog kay  wala magkasinabot sa plano ug  wala sila masuhito sa lugar. (BANAT NEWS)