Duha ka ISIS niagi sa Sugbo?

CEBU, Philippines - Duha ka mga gidudahang sakop sa Islamic State nga gidakop sa mga ahente sa Bureau of Immigration didto sa Taguig Global City niadtong kataposang bahin sa bulan sa Marso giingong nakaagi dinhi sa Sugbo.

Mao kini karon ang gisubay nga impormasyon sa kapolisan pinangulohan ni Police Regional Office-7 director Noli Taliño ug bisan si Cebu City Councilor Dave Tumulak, Deputy Mayor for Police Matters.

Apan si Taliño mipasalig nga wala silay na-monitor nga adunay presensya o terror cell dinhi sa Sugbo bisan pa man sa report nga nakaagi dinhi sa Sugbo ang magtiayong Husayn Al-Dhafiri, usa ka Kuwaiti national ug Rahaf Zina, Syrian national.

Ang duha nadakpan niadtong Marso 25 didto sa 28th Street sa Bonifacio Global City sa Taguig

Matud pa ni Taliño wa silay nadawat nga hulga o nakuhang impormasyon kun may koneksyon ang pagkasikop sa duha sa nagpadayong ASEAN meetings dinhi.

Gikatahong tulo ka bulan nang nia nagpuyo sa nasud ang duha nga matud pa nangadto pud sa Mindanao ug miagi dinhi sa Sugbo.

Kun may tinuod ang maong impormasyon gipasubay karon ni Taliño kung unsa ang gipanghimo sa duha sa dihang naagi sila sa Sugbo.

Giangkon niya nga kaniadto aduna nay mga tawong gi-monitor ang intelligence community.  Gusto mahibaw-an ni Taliño kung kining ilang gi-monitor may koneksyon sa duha.

Apan si Tumulak sa iyang bahin ni-coordinate na sa Bureau of Immigration ug gusto niya nga ipasubay sa mga malls, hotels ug ubang establisamento ang ilang mga footages sa security cameras kun nasaag ba sa ilang mga  dapit ang duha.

Nanawagan usab siya sa mga tawo, mga drayber, o uban pa sama sa mga kawani sa mga hotels, resorts, malls nga nakamay-ong sa duha dinhi sa Sugbo sa pakig-alayon sa kapolisan.

Nagtuo si Tumulak nga adunay local contacts ang duha dinhi nga posibleng nakuhaan og footages sa CCTV.

Base sa nakuhang impormasyon sa mga otoridad, si Zina mao ang biyuda sa luyoluyong lider sa ISIS (Islamic State of Iraq and Syria) nga si Abu Jandal Al-Kuwaiti kinsa nag-operate sa Syria apan napatay didto.

Ang teroristang IS o ISIS naila usab kaniadto nga mao ang Islamic State of Iraq and the Levant (ISIL). Sila nagtinguha pagtukod og kalipa o caliphate sa kalibotan ug kini gisugdan nila sa nasud sa Syria ug Iraq.

Si Cebu City Mayor Tomas Osmeña sa iyang bahin miawhag sa katawhan nga magbinantayon kanunay ug magpakabana sa ilang palibot sa tanang oras.

Kagahapong adlawa pormal nga natapos ang ASEAN Meet apan aduna pay daghang delegado ang nagpabilin sa Sugbo aron magsuroy-suroy. Jojo Ugdol ug Decemay P.Padilla (BANAT NEWS)