359 nasunugan nakaangkon na og luna

CEBU, Philippines - Nakaangkon na og luna ang 359 ka benepisyaryo nga biktima sa sunog sa Dakbayan sa Mandaue sa relocation site sa Brgy. Guizo ug Mantuyong.

Kini gipaagi sa raffle kagahapon sa udto sa Mandaue City Sports Complex.

Matud ni City Legal Officer, Atty. Omar Redulla, nga gihatagan lang og lima ka adlaw ang mga benepisyaryo sa pagdawat sa award kung dili bawion kini sa siyudad.

Ang tagsa-tagsa ka benepisyaryo makadawat og tag 28 metro kwadrado nga bahin sulod sa 9.2 ektaryang luna nga giandam sa siyudad.

Ang nahabilin nga 268 ka benepisyaryo ang pangitaan pa og luna sa siyudad.

Gidugang pa ni Redulla nga walay angay kabalak-an ang nahabilin kay han-ay na ang ilang balhinan ug wala na’y site developments nga himoon.

Asoy pa niya nga aduna na silay gitan-aw nga yuta sa Brgy. Agus, Dakbayan sa Lapu-Lapu apan mas prayoridad gyud nila ang Mandaue. (BANAT NEWS)