Snatcher, kawatan gipatay samtang nagkaon

CEBU, Philippines - Gipusil-patay samtang nagkaon sulod sa ilang panimay ang lalaking giila nga maldito sa ilang lugar, gani nabalhog na sa bilangguan gumikan sa pagpanglabni ug pagpangawat.

Nahitabo ang pagpamusil sa Purok Kawanan, Barangay Gun-ob sa Dakbayan sa Lapu-Lapu pasado alas 7 sa miaging gabii diin giila ni SPO2 Allan Pantaleon sa homicide section sa Lapu-Lapu City Police Office ang biktima nga si Jeffrey Cosep alyas Andot, 29-anyos.

Matud ni SPO2 Pantaleon nga nagkaon sa iyang panihapon ang biktima sa sulod sa ilang panimalay dihang naabot ang wala mailhing mamumuno kinsa namusil sa makadaghang higayon dayon sibat.

Dugang sa polis nga dili makahulagway sa panagway sa mamumuno ang mga silingan sa biktima kay igo ra nilang nabati ang sunod-sunod nga  buto sa armas. Wa sab sila masayod kun naglakaw ra ba o nagsakay ang mamumuno.

Sa gihimong imbestigasyon, ang namatay giila sa mga lumolupyo nga labing bagsik nga snatcher ug kawatan kinsa nabalhog na sab sa bilanggoan.

Gibutyag sab ni SPO2 Pantaleon nga sa crime scene, ilang napalgan ang 11 ka basiyo sa bala. (BANAT NEWS)