PNP walang rekord sa ‘palit-ulo’!
Kahit isa, wala talaga!
MANILA, Philippines - Negatibo o wala ni isa mang natanggap na reklamo ang Philippine National Police (PNP) laban sa kanilang mga personnels hinggil sa umano’y ‘palit –ulo scheme’ na ibinulgar ni Vice President Leni Robredo kaugnay ng pinaigting na giyera kontra droga sa bansa.
“, Zero, it’s negative. So far, we are not getting any complaints regarding her version of ‘palit-ulo scheme’ , pahayag ni Chief Supt. Dennis Siervo, Chief ng PNP Human Rights Affairs Office.
Una nang iniulat ni Vice President Robredo sa United Nations ang serye umano ng mga paglabag sa karapatang pantao ng administrasyon ni Pangulong Rodrigo Duterte na dahilan umaabot na sa mahigit 7,000 ang mga biktima ng extra judicial killings.
Sa pagbubulgar ni Robredo sa UN, ang ‘palit ulo scheme’ kapag hindi umano nakita ang target na drug personality sa operasyon ng mga awtoridad partikular na sa mga mahihirap na komunidad ay ang mga miyembro ng pamilya nito ang kanilang huhulihin.
Sakali naman ayon sa opisyal na may mga nangyayaring ‘palit ulo scheme’ sa mga barangay ay maaring maharap ang mga pulis na sangkot sa paglabag sa protocol sa kasong arbitrary detention at unlawful arrest.
Patuloy naman, ayon pa sa opisyal ang kanilang monitoring kung nasusunod ng PNP personnels partikular na ang mga anti-drug operatives ang protocol sa paggalang sa karapatang pantao sa bawat isinasagawang operasyon.
Samantalang, ipinunto pa nito na dapat ipaalam ng mga operatiba ang karapatan ng mga inaarestong kriminal at dapat ay mayroon ang mga itong dalang mga lehitimong warrant of arrest na inisyu ng korte.
- Latest
