Thea at Alden may unfinished business

Dahil sa pagsali ng Kapuso actress na si Thea Tolentino sa Destined To Be Yours, asahan daw na pagpipistahan siya ng fans nila Alden Richards at Maine Mendoza tulad nang ginagawa nila sa isa pang kontrabida ng teleserye na si Koreen Medina.

Pero ayon kay Thea, iba raw ang pagiging kontrabida ng papel niya bilang Trish sa naturang teleserye.

“Yung kay Koreen kasi, mataas ang level ng pagkakontrabida. As in, over-the-top si Marjorie. Si Trish naman, mababa lang. Kasi may history kami ng character ni Alden na si Benjie. Ako ang first girlfriend niya at first heartbreak niya,” kuwento ni Thea.

Walang dapat na ikabahala si Thea sa AlDub Nation dahil approve sila sa pagpasok nito sa teleserye. Hindi naman daw threat si Thea kay Maine dahil alam nilang may boyfriend ito, si Mikoy Morales.

Kaya si Thea, walang choice kundi aminin na matagal na ang relasyon ni Mikoy.

Four years na raw ang relasyon nila, pero walang sinasabi si Thea na official date na naging sila ni Mikoy.

“Ever since po noong maging close kami sa Protégé: The Battle For The Big Artista Break noong 2012, tuluy-tuloy na ‘yon,” ngiti  ni Thea.

Last year ay nagkaroon daw ng problema ang relasyon nila at seven months daw silang hindi muna nakitang magkasama. Pero hindi raw mako-consider ni Thea na break-up iyon dahil nagkakausap pa rin daw sila.

Kaya bago raw ang pagpasok ng 2017 ay naging maayos na ulit ang relasyon nila.

Sinon dadalawin ang fans sa Indonesia

Magsasabog ng kanyang pagiging stariray si Sinon Loresca a.k.a. Rogelia sa bansang Indonesia sa April 28.

Simula noong mag-viral ang kanyang mga catwalk videos, nagkaroon na siya ng maraming fans na mga taga-Indonesia, Malaysia at hanggang Mauritius.

Dahil gustong makilala ni Rogelia ang kanyang fans na gusto rin siyang makita ng personal at makasalamuha, inayos nito ang kanyang schedule para makalipad siya sa Jakarta, Indonesia.

Kasalukuyang busy si Rogelia sa taping ng teleserye na Impostora kung saan bida si Kris Bernal.

Nakatanggap ng dalawang mensahe si Rogelia sa social media mula sa dalawang fans niya na taga-Malaysia at Mauritius. Hanga raw sila sa kanyang self-confidence at kung paano raw siya naging inspirasyon at na-empower ang mga miyembro ng LGBT community.

Naiyak din daw sila sa sakripisyo na handang gawin ni Rogelia para sa kanyang kapatid na nangangailangan ng kidney.

Umiyak si Rogelia nang basahin niya ang dalawang mensaheng iyon dahil hindi niya alam na sa mga simpleng bagay lang na ginagawa niya ay meron siyang mga natutulungan para lumakas ang loob para harapin ang mga pagsubok sa buhay nila.

Isa pang Hollywood star nanakawan din ang bahay

Nauuso ngayon sa Hollywood ang sunud-sunod na pagnanakaw sa mga bahay ng mga celebrity.

Ang latest na victim ng robbery ay ang aktres na si Emmy Rossum.

Pinasok daw ng mga magnanakaw ang bahay ni Rossum sa Los Angeles at nagnakaw ng mga gamit na nagkakahalaga ng $150,000.

Mabilis na ni-report ito ng aktres sa Los Angeles Police Department at inaksyunan daw ito agad.

Sa kanyang Twitter, nagpasalamat si Rossum sa maayos na pag-imbestiga ng mga ito sa nangyari sa kanyang bahay.

 Ayon sa star ng TV series na Shameless, ang mga nanakaw sa bahay niya ay vintage jewelries at iba pang valuables.

Sa naging imbestigasyon, binasag ng burglars ang glass pane sa kanyang back door. Na-disable raw ang alarm ng bahay pero may surveillance camera naman daw na naka-capture ng mga nangyari.