Consignee sa basura gikan Korea gipamulta

CEBU, Philippines - Gipamulta og P300 mil sa Enviromental Management Bureau-7 ang consignee sa 5 mil ka tonelada nga basura gikan sa South Korea nga gidagsa dinhi sa Sugbo.

"The consignee,  Moving Forward Global Forwarding Inc. was slapped by DENR-EMB of penalty of around P300,000 for importing prohibited waste," matud pa ni Verne Enciso, ang chief sa Customs Investigation and Intelligence Service sa Bureau of Customs-Cebu.

Kahinumduman nga niabot sa Sugbo ang maong mga basura niadtong Enero 20, 2017 gikan sa South Korea nga luwan sa MV Christina ug giluwatan og warrant of seizure and detention ni BOC-Cebu district collector Elvira Cruz niadtong Pebrero 8 ang maong kargamento.

Nahimong kontrobersiya ang maong basura human nireklamo ang mga residente sa Barangay Tingub sa Dakbayan sa Mandaue sa kabaho niini kay ang 2,500 mil ka toneladang basura, gibutang man sa pribadong open dumpsite sa maong barangay.

Ang maong kargamento gideklarar nga wooden chips ug recycled plastic resins apan napamatud-an nga kasagarang sulod, mga ginamit nga toothbrush, plastic bags ug uban pa nga nanimaho na.

Apan matud pa ni Enciso, sa 5 mil ka tonelada, 2 mil niini wooden chips gayod ug dili kini iapil nga iuli sa South Korea.

Matud pa ni Cruz nga ang mga wooden chips ila nang gisakmit og kani ibaligya sa gobiyerno pina-agi sa usa ka public auction.

Apan kadtong mga wood chips nga kontaminado sa ubang basura nga naa sa Brgy. Tingub, apil kini nga ipabalik sa South Korea base sa rekomendasyon ug findings sa DENR-EMB nga gikasabutan atol sa inter-agency meeting nga gipatawag ni EMB-7 regional director William Cuñado nga gitambongan sa mga representante sa BOC, Cebu Port Authority, mga abogado sa  shipping lines, shipper ug consignee.

Dungag pa ni Enciso nga ang BOC Legal Service sa Manila nag-andam na sa pagpasaka og tukmang kriminal ug administratibang kaso batok sa consignee ug uban pang responsable.

Kabahin sa isyu nga ang South Korea dili modawat sa maong basura, matud pa ni Enciso wala kini malakip sa ilang mga diskusyon.

Dugang ni Enciso nga aduna silay option nga moluwat og bulletin pinaagi sa World Customs Organization's portal aron sa pagluwat og warning ngadto sa ubang nasud kabahin sa maong kargamento. - /DILT) (BANAT NEWS)