EDITORYAL - Dapat lang sibakin ‘scalawags’ na pulis
TAMA lang ang ginawa ni Philippine National Police (PNP) chief Director General Ronald dela Rosa na sibakin na ang 200 pulis na hindi sumipot para sa reassignment ng mga ito sa Basilan dalawang linggo na ang nakararaan. Ayon kay Dela Rosa, nilagdaan na niya ang dismissal ng mga pulis na sangkot sa iba’t ibang kaso. Ang pagsibak sa 200 pulis ay bahagi umano ng internal cleansing na ipinatutupad ng PNP.
Nasa 339 ang mga “scalawag” na pulis na iniharap kay President Rodrigo Duterte sa Malacañang. Sangkot sa iba’t ibang kaso ang mga pulis na kinabibilangan ng hulidap, extortion, pananakot, walang habas na pagpapaputok ng baril, pagrereport tuwing “15-30” at iba pang pang-aabuso sa puwesto. Unang balak ng Presidente na paglinisin ng Pasig River ang mga “scalawag” na pulis pero nagbago ng pasya at sinabing dalhin ang mga ito sa Basilan. Doon ay tunay na “training” ang dadaanan ng mga ito. Kapag namatay daw doon ang mga “scalawag” doon na rin ililibing ang mga ito.
Pero sa araw na dadalhin na sa Basilan ang mga “scalawag”, 53 lamang ang sumipot sa Villamor Air Base at isinakay sa C-130 patungong Zamboanga City. Mula Zamboanga ay dinala sa Basilan ang mga pulis.
Galit na galit si Dela Rosa kung bakit hindi sumipot ang mga pulis kaya nag-utos na ang patuloy na hindi magrereport at magpapaliwanag ay idedeklarang absent without leave (AWOL) at sisibakin na sa puwesto. Kailangan daw niyang ipatupad ang kautusan. Seryoso umano siya sa paglilinis sa PNP at tatamaan ang rogue cops.
Masyadong sadsad ang imahe ng PNP. Lugmok na lugmok dahil sa kagagawan na rin ng mga “bugok” na miyembro. Tama lamang na sibakin ang mga “scalawag” at hindi na ilipat kung saan-saang lugar. Hindi magagarantiya na kung ililipat ang “bugok” ay magiging mabuti, baka mahawa pa niya ang mga mabubuting itlog at maging “bugok” na rin. Sibakin na agad ang mapapatunayan!
- Latest
