Lalaki gipatay sa kapuyo sa iyang uyab
CEBU, Philippines - Dead on arrival sa tambalanan ang lalaki nga gidunggab sa makaduha ka higayon sa kapuyo sa iyang hinigugma niadtong Sabado sa gabii sa may Brgy. Patag sa Dakbayan sa Naga human sila maabti nga naghilawas.
Ang biktima mao si Nonoy Cañete, temporaryong nagpuyo sa Brgy. Tinaan sa naasoy’ng siyudad.
Matud ni PO3 Gilmer Noval, imbestigador sa Naga City Police nga nakit-an sa suspek ang biktima ug ang iyang kapuyo nga hubo ug nag-sex sulod sa ilang balay mga alas 11 sa gabii.
Gipugngan lang una sa Banat News ang pangalan sa suspek ug sa iyang live-in partner tungod sa kasensitibo sa kaso ug aduna silay duha ka gagmay’ng mga anak.
Nasayran nga gikan sa trabaho sa Lungsod sa San Fernando isip drayber ang suspek ug sinemana kining mouli.
Dihang iyang naaktuhan ang duha, gikumprontase niini ang biktima hinungdan sa ilang pagsinumbagay. Apan giuwang sila sa babaye hinungdan nga nakadagan ang biktima.
Gisuwayan pa paggukod sa suspek ang biktima apan gibira siya pagbalik sa iyang kapuyo sud sa ilang balay.
Pipila ka minutos, sekretong misulod og balik ang biktima sa balay aron kuhaon ang iyang brief apan nakit-an kini sa suspek ug gidunggab sa tiyan ug liog gamit ang kutsilyo.
Gisuwayan pa pagdala sa ospital ang biktima apan nakabsan kini sa iyang gininhawa.
Matud ni Noval pasado alas 12 kagahapon miadto sila sa balay sa suspek human sila makadawat og taho ug ila kining gi-aresto.
Sa inisyal nga imbestigasyon, ang biktima ug ang kapuyo sa suspetsado dugay-dugay na nga adunay relasyon. - /DILT) (BANAT NEWS)
- Latest