11 senador pumirma sa EJK report
MANILA, Philippines - Labing-isang senador ang lumagda sa report ng Senate blue ribbon committee na nagsasabing walang ebidensiya na gobyerno ang nasa likod ng extrajudicial killings sa bansa.
Ang 11 ay sina Senators Richard Gordon na chairman ng komite, Panfilo Lacson, Gringo Honasan, Loren Legarda, Juan Miguel Zubiri, Nancy Binay, Manny Pacquiao, Francis Pangilinan at Alan Peter Cayetano, Senate Majority Leader Tito Sotto, ex officio member at Senate President Pro Tempore Franklin Drilon, na isa ring ex-officio member.
Bagaman at lumagda sa report, may reservations naman sina Cayetano, Drilon at Honasan.
Hindi lumagda sa report sina Sens. Leila de Lima, Ralph Recto, Antonio Trillanes IV, Joseph Victor Ejercito na suspendido pa ng Sandiganbayan at Grace Poe na nasa official business.
Balak namang magbigay ng hiwalay na opinyon si Pangilinan dahil may bahagi ng report ang hindi niya sinusuportahan.
Bagaman at nakalagay sa report na libo-libo ang pinapatay sa bansa taun-taon sa nakaraang dalawang dekada, hindi naman napatunayan sa isinagawang imbestigasyon na gobyerno mismo ang nasa likod ng EJK.
Inirekomenda sa report na dapat magkaroon ng reporma sa law enforcement at palakasin ang criminal justice system para mas mapalakas ang batas.
“Many killings with impunity through the years up to the present have not been resolved by the police, leaving our people feeling unprotected, insecure, fearful, and cynical about the ability of the police to protect and serve them. There is an urgent need to undertake reforms in law enforcement and strengthen the criminal justice system to fortify the rule of law,” nakasaad sa report.
Hindi rin napatunayan sa isinagawang imbestigasyon na may Davao Death Squad (DDS).
- Latest
