Federalismo pinamamadali ni Digong

MANILA, Philippines - Pinamamadali ni Pangu­long Rodrigo Duterte kay House Speaker Pantaleon Alvarez ang pag-amyenda sa Konstitusyon upang maitayo na ang federalism.

Sinabi ni Pangulong Du­terte sa kanyang mensahe sa ikatlong local government summit ng Autonomous Region in Muslim Mindanao (ARMM) na ginanap sa Davao City kamakalawa na handa siyang magbitiw bilang pangulo para sa pagtatayo ng federal form ng gobyerno.

“Ako, I am offering my term. Sabi ko nga, ma-craft lang iyan. Wala kayong problema sa akin. If you can craft three years from now ang federal set up but I will just suggest that it must have a strong president kundi delikado ang parliament,” wika pa ni Pangulong Duterte.

“Sabi ko sa kanila, ‘Bot [Bebot], dalian n’yo iyan.’ Sabi ko, ‘Matapos kayo dalawa, tatlong taon, I will step down as president.’ You can have my word,” dagdag pa ni Duterte.

Iginiit pa ng Pangulo sa kanyang mensahe, tanging ang federal form of government ang makakalutas sa problema sa Mindanao.

“But I think the only accep­table arrangement, as of today, this moment of our generation, and of the lives of the Moro people is federalism. Other than that, bakbakan ‘to,” sabi pa ng Pangulo.