Love Story

Dear Banat News Hugyaw,

Hello sa tanang avid readers sa Banat News! Ako diay si Rady, 27 years old, nagtrabaho  sa usa ka pharmaceutical company ug  nagpuyo ko sa  Labangon, Cebu City.

Ako lang i-share ang kaagi namo sa akong uyab nga si Aubrey, 27 years old, ug nagtrabaho siya isip call center agent. Upat ka tuig na ang among relasyon sama sa uban normal ra kaayo nang mag-agi og pagsuway ang relasyon.

Dili na maihap kapila mi nagbuwag apan magbalik ra pud sunod adlaw.   Nakaingon ko kami gyud seguro sa usa’g-usa.

Nagkaila mi ni Aubrey kay nagkauban mi kaniadto sa pagtrabaho sa coffee shop, katung time nga nagtungha pa mi sa kolehiyo.

Pareha ming duha nga working students panahon sa college ug kaluoy sa Dios nakahuman gyud mi sa among pag-eskwela.

Sa time nga nagtrabaho pa mi sa coffee shop wala pa man tu’y sparks maong baliwala ra jud ko atong tayma.

Hangtod nga nangundang nami sa coffee shop kay nakahuman nami sa kolehiyo.  Tayminga sad bitaw susama mi og school year  nahuman.

Diha pa ko nagsugod og kamingaw niya.  Kana ganing naanad ka nga magkita mo permi sa trabahoan. Gabii man to among shift, maong magdungan ra sad mi og out unya dungan gyud mi og sakay og jeep kay taga Banawa ra man siya, 12L among sakyan. 

Grabe kaayo ang among bonding pero diha pa ni-spark akong feelings niya nga dili na nako siya makit-an.

Buotan baya si Aubrey, pero bisan kinsa pasultihon mura gyud ka og mataha niya tungod sa iyang kaguwapa. Pero sa kadugay namo nga panagkaila, komportable ra ko niya ug dili nako mataha niya.

Nanghagad ko niya og date ug maayo gani kay nisugot siya.  Naabot sa punto nga mag-uban na mi og travel sama didto sa Daanbantayan, Siquijor ug Badian.  Na-develop mi sa usa’g-usa, hangtod nanguyab ko niya ug iya kong gisugot. Sa pagsige namo og travel, maingon nga duna nay nahitabo namo pero kun momabdos man gani siya andam man sad ko manubag. Kay target namo magpakasal nami sunod tuig, total, nagsugod na man pud mi og tigom. Mo-request lang ko sa lyrics ug chords  sa My Destiny  by Jim Brickman.

Hi Rady! Thank you so much sa imong LOVE STORY! Paabuta ugma puhon ang imong request.

Dear Kalandrakasers, aduna ba kamo'y LOVE STORY? Suwata ka na ug ipadala pinaagi sa    pag-like sa atong bag-ong Facebook Page: Banat News Hugyaw (BNH). I-like ang atong page daan, unya i-private message ang imong LOVE STORY. Ayaw lang i-abbreviate  aron matarong og basa.

Mahimo sab nga pinaagi sa snail mail. Ang atong address mao kini:

Love Story

C/o Banat News

Corner V. Gullas and D. Jakosalem Streets

Barangay Sto. Niño  6000 Cebu City, Philippines