Blackwater mikuha ni Belo Cebuano Roger Pogoy gipili sa TNT sa Gilas draft
CEBU, Philippines - Hingpit nang nasayran sa 12 ka sakop sa Philippine national men's basketball team ang tagsa-tagsa nila ka mga PBA teams atol sa special Gilas Pilipinas draft kagahapon didto sa Robinsons' Galleria sa Manila.
Sama sa gilauman, ang kanhi sinaligang forward sa Far Eastern University nga si Mac Belo ang gipili sa Blackwater Elite. Si Belo gitan-aw karon nga bag-ong haligi sa batan-ong Blackwater.
Ang bag-o lang gikoronahan nga Governors' Cup champion nga Barangay Ginebra mikuha sa shooter nga si Kevin Ferrer sa UST, samtang ang Star Hotshots nakakuha sa point guard nga si Jio Jalalon sa Arellano.
Ang Fil-Canadian nga si Matthew Wright maoy nakuha sa Phoenix Fuel Masters, samtang ang bigman nga si Arnold Van Optsal naghinam-hinam na nga moduwa uban ang three-time MVP nga si June Mar Fajardo sa San Miguel Beermen. Laing bigman sa national team nga si Carl Bryan Cruz maoy napunta sa Alaska Aces, samtang ang GlobalPort maoy gilandingan ni Von Pessumal.
Ang Mahindra mikuha ni Russel Escoto, samtang ang Meralco Bolts mipili ni Ed Daquioag. Si Fonzo Gotladera maoy bag-ong sakop sa NLEX, samtang si Mike Tolomia moduwa sa Rain or Shine.
Ang Cebuano point guard ug kanhi CESAFI juniors MVP nga si Roger Pogoy musul-ob sa uniporme sa TNT KaTropa sugod sunod season. Ang 6-foot-3 nga si Pogoy nakuha sa national team human usab niya gipakita iyang abilidad sa UAAP sa wala pa mibida sa PBA D-League.
Sa laing bahin, ang Blackwater mipili ni Ael Banal isip No.1 overall pick sa regular draft, gisundan nila ni Gelo Alolino sa Phoenix, Jammer Jamito sa Ginebra, Joseph Eriobu sa Mahindra ug Chris Javier sa Star. (FREEMAN)
- Latest
