Roach di gusto nga mubug-at si Pacquiao

CEBU, Philippines - Gimanduan ni Hall-of-Famer trainer Freddie Roach iyang batos nga si Manny Pacquiao nga mokaun og sakto, apan gusto niya nga dili magpalabi og bug-at ang Pinoy boxing icon alang sa nagsingabot niyang sangka batok ni WBO welterweight champion Jessie Vargas sunod semana didto sa Las Vegas.

Si Pacquiao ug Vargas magsangka sa 147 lbs. weight-limit, apan si Pacquiao ubos pa sa maong timbang, rasun tugtan ra siya ni Roach nga mokaun sa unsa iyang gusto.

“I just like to see him (Pacquiao) just eat normally. Just go in there in his natural weight and use his feet,”matud pa ni Roach sa The Philippine STAR.

Hinuon ang American trainer miingon nga dili usab siya gusto nga bug-at ang pamati ni Pacquiao aron usab magamit niini ang iyang kaidlas nga maoy ilang pabor batok sa batan-ong  Mexican fighter nga si Vargas.“Do I want him to come in heavy? No, not at all,” dugang pa ni Roach.

Si Roach miingon nga daku si Vargas, apan nakita niya nga dominaron sa kanhi eight-division world champion sama sa nahitabo niadtong tuig 2008 diin gikulata ni Pacquiao ang mas taas ug mas daku nga si Oscar De La Hoya. (FREEMAN)