Prince Lee mipakugang sa Kenyan sa Gaisano C'Mall anniversary run

CEBU, Philippines - Ang Sugbuanong si Prince Joey Lee mipakurat sa Kenyan niining karibal nga si Douglas Mwiti aron pagsakmit sa 15K men's open title sa 23rd Gaisano Country Mall Anniversary Run kagahapong adlawa.

Si Lee mitikang sa finish line uban sa labing paspas nga oras nga 52 minutos ug 58.52 segundos. Igo na kaayo kini aron pagpilde ni Mwiti nga mirehistro lamang og 53:08, samtang si Michael Largo nalandig sa ikatulong dapit sa oras nga 53:40.

Sa women's category, ang wala kaayo mailhi nga si Cresabel Cadion mihimo og dakong surprisa human siya maoy gikoronahang hara. Iyang gihuman ang lumba sud sa usa ka oras, siyete minutos ug 21.53 segundos. Biya kaayo si Lovely Andrin nga miposte og 1:09:38 samtang si Meiries Ramirez maoy na-3rd sa oras nga 1:12:11.

Sa 21K half marathon, ang kababayan ni Mwiti nga si Eric Chepsiror maoy nanghawod sa oras nga 1:10:51. Si Rafael Piscos, ang Cebu leg champion sa 2016 National Milo Marathon, maoy nabutang sa ikaduhang dapit sa oras nga 1:14:22, samtang si Azlan Pagay maoy ikatulo sa oras nga 1:17:25.

Nanghawod sa women's 21K si Ruffa Sorongon sa oras nga 1:31:05. Ang nagsunod nga duha ka luna giangkon nilang Lizane Abella  (1:32:42) ug Sandra Soliano (1:45:51).

Ang top 3 sa men's 10K mao sila si Jason Padayao (35:35), James Mebei (36:07) ug Robert Daang (37:27), samtang sila si Cherry Andrin (44:44), Keisha Delechos (49:02) ug Rosemarie Tumulak (51:11) maoy labing paspas sa women's division.

Sa 5K, naghari mao sila si Erlincito Deonila (17:29) ug Riza Bausin (20:40). (FREEMAN)