EDITORYAL - Mas grabeng lunop

Mapanglantawan na daan nga moabot gyud ang higayon nga mograbe ang paglunop diha sa North Reclamation Area, dapit sa SM City Mall, kun mahuman na ang pagbutang og dagkong imbornal subay sa Juan Luna Avenue nga karon gitawag na og Pope John Paul II Avenue.

Angay unta nga sugdan na usab sa kagamhanan ang paghimo’g paagi aron nga ang tubig nga mosubay nianang gitawag og Lahing-Lahing Creek moderitso ra sa pag-agos ngadto sa dagat subay sa Mahiga Creek.

Ang dagkong mga imbornal nga gisugdan na paglubong sa daplin sa Pope John Paul II Avenue, makasulbad gyud hinoon sa pagbaha sa kinaibabwan nga bahin, ilabi kun ipaabot kini sa Salinas Drive ngadto na sa JY Square.

Pagka karon, kun adunay kusog nga uwan, ang Salinas Drive ug ang pipila ka bahin sa Pope John Paul II Avenue, mahimong sapa kay ang tubig sa uwan anha man moagi kay dili na maato pagsuyop sa gagmay’ng imbornal.

Kun mahuman na ang pagbutang sa dagko nga imbornal nga ang gihabogon makabarug ang tawo, mosirit na ang tubig subay sa imbornal ug adto ihulog ang tubig sa ilawom sa tulay sa Mabolo nga kabahin sa Lahing-Lahing Creek.

Napanid-an nga ang maong sapa maoy sagad moawas kay ang tubig niini adto man mobagat sa Mahiga Creek ug dili man dayon makaipon sa bul-og sa tubig sa maong mas dako pa nga sapa.

Kinahanglan gyud nga kining maong punto tan-awon pag-ayo sa kadagkoan sa Department of Public Works and  Highways (DPWH) aron nga dili mahitabo ang gikahadlokan nga mas grabe pang lunop sa north reclamation area.

Angay usab nga ang Cebu Port Authority (CPA) mopaspas sa ilang pagpalawom sa bukana nga bahin sa Mahiga Creek aron nga ang tubig dili mosumbalik kun adunay kusog nga uwan nga mosangpot og pagbaha.