Ginadili inigkahuman og kaon

CEBU, Philippines - Aduna gyud kita’y rotina matag human nato og kaon. Gani, mao na kini ang atong naandan matag adlaw.

Apan sa kalit-kalit nga panghitabo, aduna kita’y mga gipamati sa atong lawas nga dili nato mahibaw-an ang eksplinasyon kun ngano nisakit kini.

Suma pa sa healthierwayoflife.com, adunay mga ginadili nga buhatonon nga makatabang og pagpasabot sa mga panghitabo sa atong lawas. Kini mga panghimangno lamang ug pinaagi niini, makalikay kita sa mga gikahadlokan na’tong mga sakit.

1. Dili manigarilyo.

Matud pa sa eksperto nga ang pagpanigarilyo nagpamatuod nga mas mopaspas ang pagkatap sa mga cancer cells sa lawas.

2. Dili dayon mokaon og prutas.

Ang pagkaon og prutas maoy usa sa hinungdan sa pagbutod sa atong tiyan. Mas labing maayo mokaon og prutas human sa 1-2 oras o una mokaon og kan-on.

3. Dili moinom og tsa.

Ang mga dahon sa tsa adunay daghang acid. Kining matang sa acid maoy hinungdan sa pagkalisod og hilis sa atong kinaon.

4. Dili luagan ang bakus.

Usa usab kini sa hinungdan nga ang atong mga kinaon mababagan sa atong tinai tungod kay nalubag na kini. Dugang pa niiini, kun luagan ang bakus, dili na kita makabana-bana usab kun unsa ang gidaghanon sa pagkaon nga kinahanglan natong kan-on.

5. Dili maligo dayon.

Normal na matag buntag ang maligo inig human og kaon aron mas presko ang pagbiya sa atong panimalay apan ang wala nato  masayri, makapaspas kini sa dagan sa atong dugo sa kamot, batiis ug kalawasan. Dugang pa niini, makapakunhod kini sa dugo sa tiyan ug makapahinay kini sa proseso sa pagpahilis sa atong kinaon.

6. Dili maglakwatsa.

Matud pa sa atong mga apohan nga kun magbuhat og usa ka gatos nga lakang, mas mulungtad pa ang kinabuhi hangtod sa 99 nga pangidaron. Apan dili kini tinuod tungod kay ang paglakaw-lakaw makahimo kini og komplikasyon sa pagsuyop sa nutrisyon gikan sa mga pagkaon nga atong gikaon.

7. Dili matulog dayon.

Usa kini sa rason kung ngano dili kita mahilisan sa atong mga gikaon kung matulog ta dayon human mokaon. Gani, mao usab kini ang rason kung ngano adunay impeksyon ang atong tinai ug tiyan. (BANAT NEWS)