Osmeña motuman sigun sa balaod

CEBU, Philippines - Plano ni Cebu City Mayor Tomas Osmeña nga magpa-bidding sa mga lugar nga dunay landfill ug ang dunay pinakabarato nga tanyag maoy pilion aron didto ilabay ang basura sa siyudad kun hingpit gyud nga mapasirad-an ang Inayawan Sanitary Landfill.

 Matud ni Osmeña bisan unsay desisyon andam siya mosunod sa balaod. Sa pagkakaron, nagpaabot pa ang siyudad sa ipagawas nga desisyon sa Court of Appeals kun moisyu ba kini og temporary environmental protection order (TEPO) o dili sa petisyon nga giduso ni Kon. Joel Garganera.

Kahinumduman si Department of Environment and Natural Resources (DENR) Secretary Gina Lopez personal nga mibisita sa Inayawan landfill ug mirekomendar kini nga angay na ipasira ang landfill human niya nasayran nga duol kini kaayo sa dagat.

Giangkon sa mayor nga nakapalibog niya ang desisyon ni Lopez kay dihang nag-estorya pa sila diha sa landfill nianang Biyernes sa hapon bahin sa mga solusyon aron tarungon ang landfill, apan pagkagabii nirekomendar na kini og pagpasirado sa dapit. Si Osmeña miingon nga anaa na sa korte ang maong kaso iyahang tubagon ang tanang mga pangutana mahitungod niini.

Plano ni Osmeña nga i-rehabilitate kini ug dili na palabayan og basura ug ang mga basura nga natambak na i-convert sa energy ug kun limpyo na ang dapit mahimong ibalhin ang Cebu City Jail lakip na ang Provincial Jail sa maong lugar.

Gibasol sa mayor ang nakalabay nga administrasyon kay wa atimana ang landfill human gipasirad-an ug siya karon ang nag-antos.

“I wish I had the answer to everything right now, I’m in still mentally dislocated, and I’m trying to adjust and assess the situation,” sigon ni Osmeña.

Samtang nasuta nga dunay meeting si Garganera sa Regional Director sa Environmental Management Bureau (EMB)-7 Engr. William Cuñado karong adlaw’ng Lunes Oktubre 24.

Apan ang mayor miingon nga sa korte na lang sila mag-abot ni Garganera aron dili matuis ang mga estorya.

“Master man siya anang twisting, kinsa man gud ang nag-twist, kamo nahibawo man mo kanang akong gi-file nga case before the court, I did not twist the evidence there, it’s the evidence by DENR, EMB and DOH, if he said I twisted it, it’s like nag-twist diay ni sila sa ilang findings,” sumbalik pa sa konsehal.

Hinoon gikalipay ni Garganera nga mosunod sa balaod ang mayor.

Samtang gipahibalo ni DENR Undersecretary for Visayas Isabelo Montejo nga nahinabi sa Banat News nga ilaha na lang paabuton ang desisyon sa korte ayha pa sila molihok kabahin sa landfill. Decemay Padilla ug Rowena Capistrano (BANAT NEWS)