Palasyo nagpaliwang sa Hitler comment

MANILA, Philippines – Dumipensa kahapon ang Malacanang laban sa mga bagong batikos kay Pangulong Rodrigo Duterte dahil sa ginawa niyang pagkukum­para sa plano niyang gawin sa nasa tatlong milyong adik sa bansa sa ginawa ni Adolf Hitler na pagmasaker sa nasa tatlong milyong Hudyo.

Ayon kay Presidential spokesperson Ernesto Abella, kinikilala ng Pilipinas ang kahalagahan ng naging kara­nasan ng mga Hudyo lalo na ang trahedyang kanilang pinagdaanan.

Hindi umano layunin ng Malacanang na baliwalain ang pagkawala ng nasa 6 na milyong Hudyo sa holocaust.

Ipinaliwaang pa ni Abella na ang sinasabi ng Pangulo tungkol sa pagpatay ay dahil sa paglalarawan sa kanya bilang isang mass murderer katulad ni Hitler pero hindi nito gusto ang nasabing label o bansag.

Napaulat na hindi na­ging katanggap-tanggap sa gobyerno ng Germany ang ginawang pagkukumpara ng Pangulo sa balak niyang gawin sa nasa 3 milyong drug adik sa bansa sa tatlong milyong Hudyo na ipinapatay ni Hitler kaya ipinatawag ng German government ang Philippine ambassador sa nasabing bansa upang magpaliwanag.