Duterte inalmahan ang pagkumpara kay Hitler

MANILA, Philippines — Muli na namang sinagot ni Pangulong Rodrigo Duterte ang kaniyang mga kritiko matapos siyang ikumpara kay Adolf Hitler ng Germany sa kaniyang kampanya laban sa ilegal na droga.

"Kaya kung ikaw nandito bakit hindi ka magmumura? You're portrayed or pictured to be some cousin of Hitler and yet do not even bother to find out, to investigate," pahayag ni Duterte sa kaniyang pagdating ngayong Biyernes mula sa working visit sa Vietnam.

Binaggit din ni Duterte na wala namang isinampang kaso laban sa kaniya ang Commission on Human Rights nang idinidikit siya sa Davao Death Squad noong alkalde pa lamang siya ng lungsod ng Davao.

Sa kabila nito ay sinabi ni Duterte na handa rin niyang itumba ang mga adik sa bansa tulad ng pag-massacre ni Hitler sa mga Hudyo.

"Hitler massacred three million Jews. Now, there are three million drug addicts. I'd be happy to slaughter them" banggit ng Pangulo.

"At least if Germany had Hitler the Philippines would have... you know my victims, I would like to be all criminals to finish the problem of my country and save the next generation from perdition," dagdag niya.

Umaani ng batikos si Duterte mula sa international groups dahi sa tumataas na bilang ng mga namamatay na may kinalaman umano sa ilegal na droga.

"Okay lang sa akin, sanay ako sa pulitika. Lahat ng kababuyan dumating na sa aking buhay. Pero itong mga ganito... look kayong US, EU you can call me anything but I was never into or I am never into hypocrisy like you," sagot ng Pangulo.

Tinukoy ni Duterte ang pagsasara ng pintuan ng Amerika at Europenian Union sa mga migrante mula sa Middle East.

"There are migrants escaping from the Middle East. You allow them to rot and then you're worried about the deaths of about one thousand, or two thousand, or three thousand," dagdag niya.

Nauna nang sinabi ng Pangulo na handa niyang harapin ang imbestigasyon ng United Nations, US at EU hangga't ang batas sa Pilipinas ang susunurin.