Digong suportado ng mga Pinoy sa Vietnam

HANOI, Vietnam - Suportado ng mga Filipino community dito ang giyera kontra illegal drugs ni Pangulong Rodrigo Duterte na inilunsad sa Pilipinas.

Ito ang binigyang-diin kahapon ni Jun Felix na lider ng Filipino community dito sa Hanoi.

Ayon kay Felix, magtatagumpay ang giyera kontra illegal drugs ni Pangulong Duterte kung susuportahan ito ng bawat Pilipino lalo’t ang layunin naman ng gobyerno ay mawakasan ang illegal drugs sa Pilipinas.

Wika pa ni Felix, sa bawat giyera ay dapat may magsakripisyo dahil para naman ito sa ikabubuti ng susunod na henerasyon sa ating bansa. Aniya, mas madugo nga ang kampanya laban sa illegal drugs dito dahil may parusang bitay sa Vietnam sa pamamagitan ng ‘firing squad’.

Idinagdag pa ni Felix, dapat gumamit talaga ng kamay na bakal ang gobyerno upang tuluyang masugpo ang illegal drugs sa Pilipinas at naniniwala silang makakaya ito ni Pangulong Duterte.