Publiko hinikayat lumahok sa earthquake drill sa Setyembre 28
MANILA, Philippines - Hinikayat kahapon ng Malacañang ang publiko na lumahok sa gagawing earthquake drill sa Setyembre 28 sa gitna na rin ng naganap na 6.5 magnitude na lindol kahapon na yumanig sa Davao Oriental.
Ayon kay Usec. Ricardo Jalad, executive director ng National Disaster Risk Reduction and Management Council, mahalaga ang nasabing earthquake drill na gagawin sa buong bansa kung saan magiging highlight ang Biñan, Laguna.
“Yes sa September 28 nine o clock ng umaga magkakaroon ng-- ito ‘yung third National Earthquake Drill—National simultaneous earthquake drill. At ang highlight po natin diyan ay isang lugar diyan sa Biñan, Laguna,” pahayag ni Jalad.
Katulad ng mga nakaraang earthquake drills, magkakaroon ng maraming scenarios na inaasahang tatagal ng dalawang oras.
Isa sa mga pinaghahandaan ng gobyerno ang posibleng paggalaw ng tinatawag na West Valley Fault na makakaapekto sa ilang probinsiya sa Region 4A.
Hinikayat ni Jalad ang lahat na makiisa sa tinatawag na “duck, cover, and hold” sa sandaling magsimula na ang earthquake drill.
“Sana po sa September 28 alas nuwebe ng umaga tayo po ay mag Duck, Cover and Hold at mag-participate dito sa gagawing 3rd National Earthquake Drill. Mahalaga ang awareness dito at kaalaman natin kung ano man ang ating gagawin. Mahirap na hindi natin alam kung ano ang task. Maging todo handa po tayo pag nangyari yan. Wala po tayong preparasyon medyo malabo tayo pag kanya-kanya,” ani Jalad.
- Latest
