24-oras number coding isinulong sa Kamara
MANILA, Philippines – Upang masolusyunan ang lumalalang pagsisikip ng trapiko sa Metro Manila, isinusulong ni House Minority leader Danilo Suarez ang 24-oras na pagpapatupad ng number coding ng mga sasakyan.
Paliwanag ni Suarez, nightmare o bangungot na ang traffic sa Kamaynilaan kaya dapat nang gumawa ng preventive solution ang gobyerno para dito.
Dahil dito, nais ni Suarez na alisin na ang window at gawin nang 24 oras ang number coding bagama’t marami umano ang magagalit, dapat ring magsakripisyo ang mga may sasakyan .
Panukala rin ng kongresista na gumawa na rin ng mass transit system ang gobyerno na maaaring gamitin ng publiko bilang alternatibong paraan para magamit ng commuters sa halip na gumamit ng sasakyan.
Para naman kay Kabayan partylist Rep. Harry Roque, marami namang paraan para masolusyunan ang matinding pagsisikip ng trapiko kahit na walang emergency power kabilang na dito ang pagbubukas sa mga exclusive subdivision.
Iginiit naman ni Buhay partylist Rep. Lito Atienza na bago humingi ng emergency powers ang Pangulo ay dapat na makita muna na nagtatrabaho rin na may emergency rule ang bawat ahensiya ng gobyerno tulad ng Department of Transportation.
Aniya, dapat alisin muna ang mga nakabalagbag na bus sa kahabaan ng EDSA at dapat tapusin muna ng Department of Public Works and Highways (DPWH) ang lahat ng mga nakatiwangwang na proyekto sa mga pangunahing lansangan.
Maging ang mga secondary road umano na ginagawang labahan at parking ay dapat nang linisin para madaanan ng mga sasakyan.
- Latest