15 sundalo utas sa Abu Sayyaf

MANILA, Philippines – Patay ang 15 sundalo matapos makaengkwentro ang bandidong grupong Abu Sayyaf kahapon, ang pinakamalaking bilang ng mga nasawi sa loob ng isang araw sa ilalim ng administrasyon ni Pangulong Rodrigo Duterte.

Bukod sa mga nasawi, lima pang sundalo ang sugatan sa dalawang oras na engkwentro sa Patikul, Sulu, habang dala ang namatay sa hanay ng Abu Sayyaf.

Patuloy ang pinaigting na pagtugis ng pwersa ng gobyerno sa bandidong grupo kasunod ng utos ni Duterte.

Inutos ni Duterte ang pagdurog sa Abu Sayyaf matapos pugutan ng ulo ang kanilang binatilyong bihag sa kabila ng pagbabayad ng ransom.

Nitong Sabado at Linggo lamang ay 21 miyembro ng Abu Sayyaf ang napatay ng military sa kagubatan pa rin ng Patikul kung saan itinatago ng bandidong grupo ang ilan sa kanilang mga bihag.