Mga testigo lumutang! Kaso vs De Lima et al ikinakasa

MANILA, Philippines - Ikinakasa na ng pamahalaan ang mga kaso na posibleng isampa laban kay Senator Leila de Lima, ilang matataas na opisyales ng gobyerno at iba pang personalidad na tinukoy ni Pangulong Rodrigo Duterte na nasa “drug matrix” ng New Bilibid Prison (NBP) matapos na lumutang ang maraming testigo, ayon sa Malacañang kahapon.

Sinabi ni Presidential Spokesman Ernesto Abella sa press briefing sa Palasyo na posibleng isampa ang graft at drug related cases laban kay Sen. de Lima at iba pang mga tinukoy sa drug matrix sa Bilibid na sina dating Justice Usec. Francisco Baraan, Pangasinan Rep. Amado Espino Jr., dating driver-bodyguard at umano’y ‘lover’ ni Sen. de Lima na si Ronnie Dayan, da­ting Bureau of Corrections (BuCor) director Franklin Bucayu, Board Member Raul Singson Jr. at da­ting Pangasinan provincial administrator Raffy Baraan.

Kinumpirma ni Abella na marami nang nakuhang testigo  ang gobyerno kabilang na dito ang mga opisyales, jailguards at mga preso ng NBP, at da­ting mga kaibigan ng mga nabanggit upang madiin sa kaso si de Lima at mga kasamahan.

 “Let us take a cue na lang from what DOJ (Department of Justice) said that several witnesses have come out to prove the allegations against certain personalities. And they are in the process of taking affidavits of these particular witnesses including NBP guards, inmates, and former friends of these personalities that have been referred to,” wika ni Abella.

Idinagdag ni Abella na kasalukuyan nang kinukuhanan ng salaysay ang mga testigo bilang paghahanda sa paghahain ng kaso kay Sen. de Lima at tinukoy sa matrix sa drug activity sa NBP.

“If and when they have been verified, charges may have to deal with graft and drug-related graft once information is actually verified,” dagdag ni Abella.

Samantala, sinabi ni Presidential Communications Office Sec. Martin Andanar na hindi na makukuha pang tumawa at magbiro si Sen. Leila de Lima sa sandaling mabuo na ang kasong inihahanda laban sa kanya at mga sangkot sa Muntinlupa drug connection sa loob ng NBP. 

Sinabi ni Andanar, ang ibinulgar na matrix ni Pangulong Duterte ay batay sa intelligence effort ng pulisya at Philippine Drug Enforcement Agency (PDEA).

“Just like the matrix before, those mentioned in the President’s previous revelations are given the chance to submit their counter affidavits indicating that they have no involvement in whatsoever capa­city in the illegal drug trade,” pahayag ni Andanar.

Matapos na ilabas ng Pangulo ang drug matrix, tinawag na basura ito ni de Lima. Giit ni Andanar, hin­di ilalabas ng Pangulo ang naturang matrix kung walang matibay na ebidensiya at basehan laban kay de Lima na nagsilbing top government official sa matrix.