Lindol sa Italy: 170,000 Pinoy ligtas
MANILA, Philippines – Nasa ligtas na kalagayan ang may 170,000 Pinoy sa Italy matapos na tumama ang 6.2 magnitude na lindol sa katimugang bahagi ng nasabing bansa kahapon.
Sa ulat na tinanggap ng Pilipinas sa Embahada ng Pilipinas sa Rome, wala pa silang natatanggap na ulat na may Pinoy na kabilang sa may 63 katao na nasawi, 150 nawawala sa pagtama ng lindol dakong alas-3:36 ng madaling araw (oras sa Italy) o alas-9:36 ng umaga sa Pilipinas. Pinangangambahan na marami pa ang na-trap at nalibing nang buhay sa mga gumuhong gusali dulot ng malakas na pagyanig na naramdaman may 150 metro ang layo mula sa epicenter ng lindol.
Sinabi ng DFA na patuloy na nakikipag-ugnayan ang Embahada sa mga awtoridad upang matiyak na walang Pinoy na kasama sa naapektuhan ng lindol.
Base sa pagtaya ng US Geological Survey, ang 6.2 lindol ay tumama may 10 kilometro sa southeast Norcia, isang lalawigan sa Perugia, southeastern Umbria.
Nagkaroon ng 60 na aftershocks kabilang ang 5.5 magnitude, may apat na kilometro ang layo sa northeast Norcia.
- Latest