Diaz pinarangalan pa sa Kamara

MANILA, Philippines – Pinarangalan kahapon sa Kamara ang Pinay weightlifter na si Hidilyn Diaz na nagwagi sa Rio Olympics matapos makasungkit sa silver medal.

Ang parangal kay Diaz ay bunsod sa sangkaterbang resolusyon na inihain sa Mababang Kapulungan na naglalayong kilalanin ang kahusayan nito matapos tuldukan ang 20  taong pagka-uhaw ng Pilipinas sa medalya sa Olympics.

Tumanggap si Diaz ng plaque at gold plated congressional medal of distinction, ang pinakamataas na parangal na ipinagkakaloob ng Kamara.

Bukod dito, pinagkalooban din si Diaz ng P1.4 milyon na cash incentive ng mga kongresista.

Nagmistula namang rockstar si Diaz na pinagkaguluhan hindi lamang ng mga empleyado kundi ng mismong mga miyembro ng Kamara na nagkanya-kanyang selfie sa atleta.