Dahil sa bakbakan ng AFP at ASG 17,000 katao nagsilikas sa Basilan, Sulu
MANILA, Philippines – Umaabot sa 3,400 pamilya o kabuuang 17,000 katao ang nagsilikas sa kanilang mga tahanan sa takot na maipit sa bakbakan sa opensiba ng tropa ng militar laban sa mga bandidong Abu Sayyaf Group (ASG) sa lalawigan ng Basilan at Sulu.
Sa ulat, nitong Biyernes ay anim na bandidong Abu Sayyaf ang napaslang habang 11 ang nasugatan sa pinalakas na Focused Military Operations (FMO) sa nasabing mga lalawigan na balwarte ng mga bandido.
Kabilang sa mga nagsilikas na mga residente ay mula sa mga bayan ng Tipo-tipo, Al-Barka at Ungkaya Pukan sa Basilan habang ang iba naman ay mula sa mga bayan na apektado ng sagupaan sa Sulu.
Nabatid na dalawa sa mga bandido ay napatay sa Basilan na mga tauhan ni Abu Sayyaf Commander Radzmil Jannatul, alyas Abu Khubabyb.
Nagpapatuloy naman ang operasyon ng militar upang masagip ang nalalabi pang mga hostages ng mga bandido sa lalawigan ng Sulu.
Kaugnay nito, namahagi naman ang lokal na pamahalaan ng mga relief goods sa mga apektadong mga pamilya.
- Latest