P1.1-M halaga ng kontrabando nakumpiska sa Bilibid

MANILA, Philippines — Sa patuloy na paglilinis sa New Bilibid Prison, aabot sa P1.1 milyong halaga ng mga ipinagbabawal na kagamitan sa loob ng kulungan ang nakuha ng Philippine National Police-Special Action Force (PNP-SAF).

Sinabi ni Justice Secretary Vitaliano Aguirre II na aabot sa P612,999 na halaga ng pera ang nakumpiska ng PNP-SAF nitong Hulyo 20 hanggang 26.

Bukod sa pera ay nabawi rin sa mga preso ang 80 patalim, 12 ice pick, kalibre 38 pistol, anim na improvised shotguns, 152 cellular phones, 62 phone chargers, anim na pakete ng shabu, isang pakete ng marijuana at 48 television sets.

BASAHIN: SAF pupuwesto sa Bilibid

Inaalam na ng DOJ kung sino ang mga dapat managot sa pagpasok ng mga ipinagbabawal na kagamitan sa kulungan.

"Once we have determined their violations, you have our word that we will pursue them, to borrow the words of President (Rodrigo) Duterte, relentlessly. The hammer shall fall and it shall fall mightily. There will be no sacred cows. This is just the first barrage of our war on drugs," pahayag ni Aguirre.

Tiniyak ng kalihim na patuloy nilang lilinisin ang pinakamalaking kulungan sa bansa na pinaniniwalaang pinanggagalingan din ng ilegal na droga.

"We shall marshal all the powers and the resources at our disposal to eradicate these problems. We will give no quarters nor chance for these evils to find a place to grow. It is high time that we take the fight to them," sabi ni Aguirre.

Nitong Hulyo ay ang PNP-SAF na ang nagbabantay sa mga preso, habang ang mga jail guards na dating mga nakapwesto ay sumasailaliim sa pagsasanay bago ikalat sa iba’t ibang kulungan sa bansa.

Nauna na ring sinabi ni Aguirre na ilang buwan lamang ang itatagal ng SAF sa Bilibid bago palitan ng Marines.