3 BIR tax examiner pinarusahan sa korapsyon

MANILA, Philippines - Sinuspinde ng 90-araw sa tungkulin ng bagong upong Internal Revenue Commissioner Caesar R. Dulay ang tatlong tauhan ng Bureau of Internal Revenue (BIR) dahil sa korapsyon.

Ito ay makaraang pirmahan ni Dulay ang formal administrative charges at preventive suspension orders laban kina revenue officers Susan Ferrer , Rogelio  Jugao at Crisanto Olazo (group supervisor) ng Revenue District Office No. 40, Cubao, Revenue Region No. 7, Quezon City.

 Pinasasampahan din ang tatlo ng hiwalay na kasong kriminal sa alinmang korte sa bansa at inatasan silang iturn-over ang lahat ng government properties na nasa kanilang pag-iingat gayundin ang mga trabahong hindi pa natatapos.

Ang kaso laban sa tatlo ay nag-ugat sa reklamo ng isang taxpayer sa tanggapan ni Dulay na agad namang inaksiyunan nito.

 Sa rekord, sina Ferrer at Jugao ay tumawag sa complainant at nakipagtagpo sa isang restaurant para pag-usapan ang audit at pagpapalabas ng preliminary assessment notice at final assessment notice. Tinangka umano nilang kolektahan ng P30 milyon at P3 milyon ang complainant para sa adjustment o settlement ng tax liability. Nadamay si Olazo dahil sa pagkabigo nitong pigilan ang ginagawang katiwalian nina Ferrer at Jugao at sa halip ay kinunsinte pa na hingan ni Jugao ang complaint ng P30 milyon para sa umano’y settlement.