Sa kampanya vs droga mga artista, rich kids isusunod!
MANILA, Philippines - Isusunod na ng pulisya sa pinaigting na anti-drug campaign ang mga kilalang personalidad sa showbiz at mga anak ng buena pamilya na pinaghihinalaang sangkot sa pagtutulak at paggamit ng anumang uri ng ipinagbabawal na droga.
Ito ang determinadong inihayag kahapon ni Southern Police District (SPD) Acting Director P/Sr. Supt Tomas Apolinario Jr., bilang pagtalima sa kautusan ni Pangulong Rodrigo Duterte na tuldukan ng Philippine National Police (PNP) ang malalang problema ng pamahalaan sa illegal drugs sa loob ng tatlo-anim buwan.
Gayunman, tumanggi si Apolinario na tukuyin kung sino sa mga celebrities at anak ng mga mayayamang pamilya ang nasa drug watchlist ng pulisya sa pagsasabing darating na lamang sila sa puntong ito at wala silang sasantuhin sa operasyon.
Sinabi ni Apolinario na kabilang sa kanilang tututukan sa anti-drug operations ng PNP ay ang paglaganap ng mga tinaguriang party drugs tulad ng ecstacy.
Ginawa ni Apolinario ang pahayag matapos na lima katao kabilang ang ilang mga kabataan ang nasawi mula sa isang umano’y drug overdose sa isang ‘Summer Forever Concert” ng Close up sa isang mall sa Pasay City noong Mayo.
Maigting ngayong nakikipagkoordinasyon ang PNP sa mga party at concert organizers upang matiyak na hindi mapapasukan ng droga ang mga aktibidad na ito na karaniwang dinadaluhan ng mga mayayamang kabataan at mga artista.
- Latest