Pagdinig sa ‘emergency power’ bibilisan
MANILA, Philippines – Tiniyak kahapon ni Senator Grace Poe na magpapatawag agad siya ng public hearing upang mabilisan ang pagtalakay sa panukalang batas na naglalayong mabigyan ng emergency power si Pangulong Rodrigo Duterte upang matugunan ang matinding problema ng trapiko sa bansa.
Sa Senate committee on public services na pinamumunuan ni Poe napunta ang panukalang batas tungkol sa pagbibigay ng emergency powers sa Pangulo.
Binigyang-diin ni Poe na nararamdaman niya ang pagod ng mga mamamayan at maging ang ekonomiya ay napa-paralyzed dahil sa matinding trapiko na nararanasan sa iba’t ibang panig ng bansa lalo na sa Metro Manila.
Samantala, sinabi ni Senator Ralph Recto na dapat ay FOI (freedom of information) complaint ang lahat ng impormasyon kaugnay sa mga proyekto, programs at kontrata na mabubuo sa ilalim ng emergency powers tungkol sa trapiko.
Nais naman nina Senate President Pro-Tempore Franklin Drilon at Senator Ralph Recto na matiyak na may sapat na kasiguraduhan na hindi maabuso at mapo-protektahan ang interes ng gobyerno at mga mamamayan sa isinusulong na emergency power bill na inaasahang magiging daan upang mapabilis ang pagbibigay ng solusyon sa problema sa trapiko.
Sinabi nina Drilon at Recto na marapat lamang na mabigyan ng proteksiyon ang kapakanan ng publiko. Dapat umanong maging “disadvantageous” sa mga mamamayan ang mga papasuking proyekto katulad na lamang nang ipasa ang Electric Power Crisis Act noong 1993.
- Latest