Hindi lang pulis, sundalo: Sahod ng manggagawa taasan din - Obispo
MANILA, Philippines - Nanawagan si Diocese of Cubao Bishop Honesto Ongtioco kay Pangulong Rodrigo Duterte na huwag lamang mga pulis at sundalo ang taasan ng sahod kundi lahat ng mga manggagawa sa bansa.
Ayon kay Bishop Ongtioco, nararapat na bigyan din ng umento ang mga ordinaryong manggagawa na halos nabibigatan sa taas na ipinatong na buwis sa kanilang buwanang sahod na kakarampot na lamang ang kanilang naiuuwi sa kanilang pamilya.
Aniya, ang bawat manggagawa ay may kontribusyon sa bayan kaya dapat lamang nilang matamasa.
“Hindi lang sa akin sa pulis ang sinasabi kong itaas ang suweldo, lahat ng manggagawa kung maaari bigyan ng umento,” ani Ongtioco.
Naniniwala rin ang obispo na kung magiging sapat lamang ang sweldo ng bawat manggagawa ay hindi na magigipit ang bawat pamilya sa kanilang mga pang-araw-araw na pangangailangan.
Sinabi ni Ongtioco, mas makapagtatrabaho nang maayos ang isäng manggagawa kung maayos ang kanyang sinusuweldo.
Nakapagtala naman ang Trade Union Congress of the Philippines o TUCP ngayong 2016 na mahigit 67.1 milyon na ang bilang ng mga manggagawang Pilipino sa buong bansa na umaasa sa pagpapababa ng buwis at pagtataas ng kanilang buwang sahod.
Nauna na ring binanggit ng kanyang Kabanalan Francisco sa United Nations na mahalagang kilalanin ng estado ang pangangailangan ng mga manggagawa na siyang katuwang nito tungo sa kaunlaran.
- Latest
