Pimentel naluklok na Senate President
Recto, Minority leader
MANILA, Philippines - Naihalal na kahapon bilang bagong lider ng 17th Congress si Senate President Aquilino “Koko” Pimentel III samantalang si Senator Ralph Recto naman ang bagong minority leader.
Dalawampung senador ang bomoto para kay Pimentel na ni-nominate ni Senator Vicente “Tito” Sotto III at sinegundahan ni Senator Juan Miguel Zubiri.
Sa kanyang nomination speech, sinabi ni Zubiri na bagaman at nagkaroon sila ng “unfortunate experience” ni Pimentel bilang magkaribal sa posisyon sa Senado, isinasantabi na nila ito para sa pagkakaisa.
Matatandaan na naging mahigpit na magkaribal sina Zubiri at Pimentel noong 15th Congress matapos maghain ng election protest si Pimentel laban kay Zubiri na naging dahilan upang magbitiw na lamang sa kanyang tungkulin ang huli.
Bukod kina Zubiri at Sotto, bomoto rin ng pabor kay Pimentel sina Senators Panfilo “Ping” Lacson, Joel Villanueva, Nancy Binay, Win Gatchalian, Sonny Angara, JV Ejercito, Richard Gordon, Cynthia Villar, Kiko Pangilinan, Risa Hontiveros, Gregorio Honasan, Franklin Drilon, Leila de Lima, Grace Poe, Manny Pacquiao, Loren Legarda, Franklin Drilon at Bam Aquino.
Tatlong senador ang bomoto para kay Recto na kinabibilangan nina Pimentel, Senators Antonio Trillanes IV at Francis “Chiz” Escudero. Awtomatikong magiging miyembro ng minorya sina Recto, Escudero, at Trillanes.
Tanging si Senator Alan Peter Cayetano ang “absent” na senador at hindi nakasali sa botohan.
Nahalal naman bilang bagong Senate President Pro-Tempore si Senator Franklin Drilon, at bagong Majority Leader at chairman ng Senate Committee on Rules si Senator Vicente “Tito” Sotto III.
- Latest
