Pacquiao kumalas kay Binay, balik PDP-Laban
MANILA, Philippines – Kumalas na sa partidong United Nationalist Alliance (UNA) ni dating Vice President Jejomar Binay si Senator Manny Pacquiao at bumalik sa dating political party na Partido Demokratiko Pilipino-Lakas ng Bayan (PDP-Laban).
Kahapon ay pormal na nanumpa si Pacquiao sa harap ni Senator Aquilino “Koko” Pimentel III, presidente ng PDP-Laban.
Kasama si Pacquiao sa mga dumalo sa pagtitipon ng PDP-Laban sa Makati kung saan kinumpirma ni Pimentel na 19 senador na ang sumusuporta sa kanya bilang susunod na presidente ng Senado sa pagbubukas ng 17th Congress sa Lunes.
Paglilinaw ni Pacquiao, dati naman talaga siyang PDP-Laban bagaman at kumandidato siya sa ilalim ng UNA noong nakaraang halalan.
Dahil sa pagbabalik ni Pacquiao sa PDP-Laban, dalawa na sila ni Pimentel na kasapi ng nasabing partido sa Senado.
Samantala, kabilang rin sa lumagda na sa resolusyon na magluluklok kay Pimentel bilang Senate President sa Lunes si Senators JV Ejercito at Juan Miguel Zubiri.
Inihayag rin ni Pimentel na nagparaya na sa kanya si Senator Alan Peter Cayetano na nauna nang nagbalak na pumalit sa puwesto ni outgoing Senate President Franklin Drilon.
Ang mga hindi na lamang pumipirma sa resolusyon ay sina Cayetano, Senators Antonio Trillanes IV, Ralph Recto, Cynthia Villar, at Francis “Chiz” Escudero.
- Latest
